عندك الباك دخل تموتيفا شوية ماتبقاش فيك الخلعة

نصيحة_لصحاب_الباك#

انا عارف بلي الأجواء عندكم فشكل او المشاعر مخلطا ب التوتر حيث الأوضاع مختلفة مع هاذ فيروس كورونا او شويا ديال الفرحة حيت بغيتي تفك عليك خلاص الامتحان باش ترتاح حتا يمشي هاد الحجر الصحي تمشي البحر او تسافر .. إن شاء لله الله يرفع عنا هذا الوباء والبلاء .. المهم ماتقتلش راسك بالحفاظة لاحقاش الدماغ غادي يوصل لواحد المرحلة ماغاديش يبقا يستوعب حتى جملة مفيدة .. الباك عندكوم فيها شوية ديال الخدمة بالعقل .. ♥️ 

لمهم انا متأكد بلي غاديين تكونوا سمعتو هاد الهضرة كل نهار لي تلاقيتوه غادي يقوليك شوف رتاح او بشوية عليك او شد الورقة او قراها الف مرة عاد كتب او خود البلنكو او بالشوية عليك او راجع الورقة ديالك او عنداك .. او كول الزبيب مع الصباح او سير بكرى .. هاد الهضرة طيباتني حفظتها او مانفعا بوالو ماكاينش لي كايزيد ليك الستريس قد هاد الهضرة .. 🤦🏻‍♂️

انا عندي واحد المبدأ فحياتي الإمتحان ماشي فيروس كورونا ماكايخلعنيش .. كاتلقا بنادم غادي يدوز امتحان بحال ايلا غادي لمقصلة الاعدام كاينوض كاع العائلة او شي داخل او شي خارج او قبل مايخرج كايبوس كاع العائلة او كلو كايترعد او فيه الخوف .. تقول غادي يجربوا بيه السحور بزاف هادشي .. فيق بشويا عليك كيف ما كاتدير ديما بحال ايلا غادي تقرا عادي توضى وتصلي شي جوج ركعات او قول الدعاء ديالك .. ماتشد لا طاكسي ماتقول لباباك يوصلك ما والو باش تحس براسك غادي عادي .. ♥️ 

Er_h

داك الصباح كايكون زويين الدنيا خاويا غير نتا او الناس لي عندهم امتحان لي كاتمشاو .. استغل ديك اللحضة قرا القرآن الكريم اولا دير شي حاجة لي كاتخليك مرتاح وتضحك .. فاش توصل حدا الباب غادي تلقا صحابك على الأعصاب

انت فاش تلاقا معا صحابك او تلقاهوم داخلا عليهوم حاول شي شويا ضحك معاهوم ماتخليهومش يتزيرو منها كاتفوج عليهوم منها كاتفوج على راسك .. ♥️ 

Er_h

فاش يحطو ليك الورقة كاع ماتزير راسك خدم بحال ايلا عطاوك تمرين فالمراجعة لكن انتبه لحاجة وحدة هو الوقت .. زرب على راسك ماتعطلش او ايلا كان باااقي ليك الوقت هز راسك او دور عند شي صاحبك ابتسم معاه اولا دير شي حاجة فشكل ماتنساوش تخليوا مسافة الأمان هههههه .. انا ف بحال هاد الظروف خاصني نبدا نتكسل او ننغز هاداك لي قدامي ولا لي فجنبي نقوليه .. افين اخويا المعطي لاباس بيخير العائلة كلشي مزيان الحجر الصحي عطا المفعول ديالوا فيك ههههه .. واخا ماكانعرفوش لمهم باش نحس براسي مرتاح .. او حاولو ماضيعوش النقاط غير هاكداك تبقا تقول هاد غير نص نقطة ماعندي ماندير بيه .. ♥️ 

Er_h

بالنسبة للاخوان الأبطال ماتحاولش تبين راسك بطل على المراقب راه كين الأمن في الباب او ماغاديش يحير فيك يخليك تا تخرج او يكتب بيك تقرير او باي باي حتا تفوت هاد الجائحة د كورونا .. ايلا وصل التقرير للاكديمية راه واخا يجي سي العثماني رفقة بنكيمون .. ماغاديش يسمحوليك يعني ايلا لقيتي كيفاش دير غير ساويها مع الاستاد فالقسم بلاتي هي احسن .. فالامتحان كاتكثر واحد الظاهرة عجيبة هي الاصداق كايتحولو إلى بشر لا يسمع ماكابقاوش يسمعو مساكين( هاد الخاصية عندهم مشتركة مع الثعابين تا هوما فحالات الخوف ماكايبقاوش يسمعو ) واخا تعيط ليه تال الصباح ماغايسمعكش حيت مركز مسكين (لمهم ان بعض الضن إثم ) غير تعاملوا مع خوتكم حتا تفوت هاد الجائحة .. ههههه🙆🏻‍♂️

او فاش تكون كادوز فكر بلي غير غادي تسالي هادشي راه غادي تجيب نفطة زوينة غادي تفرح مالين الدار و العائلة 

او فالمقابل فكر بلي ايلا جبتي الربحة غادي تجيك الغبينة او غادي تنقاطع الضحكة فالدار لمدة سيمانة على الاقل تا واليديك ماغاتقدرش تشوف فيهوم او كاتحس بالدنب .. بلا مانقوليك بلي غادي تجيك واحد الكئابة حتى تبقا تقول تا حاجة مازوينة .. او فاش تحل الفايسبوك تلقا بتادم فرحان .. اونتا مقاتل كاتوجد لرطرباج اولا السنة المقبلة .. حظ سعيد للجميع .. الله ينجحكم كاملين و تفرحوا الواليدة ديالكم .. ♥️🙌🏻

بالتوفيق للجميع وماتنساوش بقات 15 يوم حاولو تزيرو راسكوم فيها ومزيااان