كلية العلوم "بيولوجي"

خاص ناس للي غايديرو بيولوجي

 العام الأول !!

#Faculty_des_sciences_biologie 

..

..

..

..

..

سلام عليكم كنت كتبت هاذ بوسطات فواحد الكروب وبما أن بزااف كيعاودو يسولو كاين لي تجلاو عليه حطيتهم هنا مرتبين فحسابي الشخصي  نبداو على بركة الله الموضوع مقسم على 3 فقرات  

_نظام الدراسة شعبة البيولوجي 

-أفاق شعبة البيولوجي 

-نصائح للعطلة 

وفكل فقرة أنوضح فيها كولشي ولي عندو شي سؤال يحطو فكومنطير وكنتمنى من تخصوصات لخرين يديرو نفس القضية يالاه نبداو بالموضوع الأول نظام الدراسة شعبة البيولوجي أول حاجة أتكونو كتسمعو بزااف الأفكار المزفتة على لافاك فهاد الفترة وتأنا كنت سمعتها وكنت كنتخايلها بحال شي حبس هعهه  وملي مشيت تصدمت تاحاجة من داكشي ماصدق  وزيد واحد الحاجة الناس لي كتقول ليك شكون حسن لافاك ولا ليستا ؟ واش نتوما صافا ؟ لا مجال للمقارنة كتقارن ديبلوم بمدرسة عليا (إجازة ماستر دكتورة ) شوية اللوجيك شوف أشنو باغي ولي تقدر تكمل فيه وتوكل على الله كلية العلوم بصفة عامة كتبغي الخدمة وغي نسى عليك ديك الهضرة ديال لافاك التسركيل ههه والله مكاينة وخصوصا البيولوجي البروكرام شارجي حيت كتقرا 7 مواد فسيمانة 2 ساعات الدرس و 2 ساعات تمارين و 4 ساعات أعمال تطبيقية يقدر توصل السيمانة تقراها كاملة من 8 ل 6   إذن إلا بديتي الخدمة من لول أتلقى نتيجة عطيتيها تفلية راه متلقى والو حيت البيو عطيها تعطيك أنشرح ليكم داكشي لي قريت فكلية العلوم إبن زهر أكادير 

أشنو أنقراو فالعام اللول ؟

أول حاجة 

كاين cours كتقراوه فأمفي وكيكون الدكتور كيشرح كيمتل 75% فالنقطة

وكاين travaux dérige  (td)يعني التمارين كتقراوه فصال بحال القسم كتكونو قلال 

وكاينtp) travaux pratique) يعني الأعمال التطبيقيةكتكونو قلال شي 15 تقريبا وكيكون فيه الغياب  كطبقو  داكشي لي قريتو كدخلو لابو وديرو تجارب تشريح .....كيمتل  25%

-biologie cellulaire  

هادي البيولوجيا الخلوية أتقراو على الخلية والمكونات ديالها   داكشي لي قريتو فالباك بحال الخبر الوراتي لي كيكون فالنواة والغشاء الخلية الدور ديالو هذا الدرس كتقراوه مجموعين ف أمفي مهم هادشي وفيه تمارين ديال الخبر  الوراتي  و أعمال التطبقية tpأدخلو المختبر كل 2 أيخدمو بيناتهم (ضروري طابلية بنات ودراري ههه ) وغتعرف على الميكروسكوب وتشوفو الخلايا ديال الدم ونتوما لي خاصكم تحكمو فداكشي الأستاذ يوريك ونتا طبق إلا ماقديتيهاش شريتيها هههه 

-Embryologie histologie

هذا علم الأنسجة وكيف تكون الجنين أتعرفوه فدرس مزيان والتمارين مافيهش تطبيق tp

_ physique 

أتقراو الميكانيك وthermo وحتى التناقص الإشعاعي لي قريتو فالباك والتمارين وأديرو التطبيق tp أترسمو المبيانات وشي حساب (إمتحان كتابي )

Chimie 

أتقراو روابط الكيمائية و thermoداكشي ديال الباك وزيد شوية ٠٠٠ وطبعا التمارين والتطبيقtp  أديرو تجارب المعايرة وحمض قاعدة (إمتحان كتابي )

-math  

داكشي ديال الباك وشوية ديال الماتريس ديال صيونص ماط  تمارين مافيهش تطبيق tp

-lt 

اللغة فيها شوية الدروس ديال الحجاج و كيفاش تكتب نص علمي 

-geologie generale

أتقراو على علم الفلك cosmologie وعلى علم المناخ climatologie وأديرو تمارين تعرفو على دور القمر وكيفاش الأرض متوازنة .... وtp أ درسو الخرائط وترسموها  

العام الأول بيولوجي وجيولوجي كيقراو بحال بحال  والعام التاني كل واحد كيتخصص 

هادشي غي السومستر الأول (الدورة الأولى ) والسومستر تاني كاين مواد أخرين بالنسبة اللغة الفرنسية  مكاينش مشكل أتعودو عليها إن شاء الله ههه تحية لي قرا تالخر 

الكمالة فكومنتير طاكي صاحبك يستافد